Keraleeyam

ഒരു കാലത്ത് സവർണ്ണ പുരുഷ നായക ബിംബങ്ങൾ നിയന്ത്രിച്ചിരുന്ന മലയാള മുഖ്യധാരാ സിനിമ വലിയ മാറ്റങ്ങളിലൂടെ കടന്നുപോവുകയാണ്. സ്ത്രീകൾക്കും ചെറുപ്പക്കാർക്കും പ്രാമുഖ്യം ലഭിക്കുന്ന സിനിമകൾ ബോക്സ് ഓഫീസിൽ തുടർച്ചയായി ചരിത്രം സൃഷ്ടിക്കുന്നു. ഈ മാറ്റം നൽകുന്ന പ്രതീക്ഷകൾ എന്തെല്ലാമാണ്? അധ്യാപികയും എഴുത്തുകാരിയുമായ ഡോ. അനു പാപ്പച്ചൻ സംസാരിക്കുന്നു.

സിപിഎമ്മിന്റെ തെറ്റുതിരുത്തൽ പ്രക്രിയ പൂർണ്ണമായും ലക്ഷ്യം കണ്ടിട്ടുണ്ടോ എന്ന കാര്യത്തിൽ രാഷ്ട്രീയ നിരീക്ഷകർക്കിടയിൽ വ്യത്യസ്ത അഭിപ്രായങ്ങളാണുള്ളത്. അധികാര കേന്ദ്രീകരണവും മതേതര പ്രതിച്ഛായയ്ക്കുണ്ടായ പരിക്കും ജനങ്ങളിൽ നിന്നുണ്ടായ അകൽച്ചയും പാ‍ർട്ടി എങ്ങനെയാണ് പരിഹരിക്കാൻ പോകുന്നത്? മാധ്യമ പ്രവർത്തകനും 'സ്റ്റോറി മോങ്ക്' ഫൗണ്ടർ എഡിറ്ററുമായ എം.പി ബഷീർ സംസാരിക്കുന്നു.

സോഷ്യൽ മീഡിയയിൽ തരംഗമായ 80കളിലെ എഐ ഫോട്ടോ ട്രെൻഡുകൾക്ക് പിന്നിൽ ഒട്ടനവധി അപകടങ്ങൾ ഒളിഞ്ഞിരിപ്പുണ്ട്. ഗൂഢതാത്പര്യങ്ങളോടെ നിർമ്മിക്കപ്പെടുന്ന ഇത്തരം ട്രെൻഡുകൾ അന്ധമായി ആഘോഷിക്കപ്പെടുമ്പോൾ, വ്യക്തിഗത വിവരങ്ങളുടെ ചോർച്ചയും ഡാറ്റാ സെന്ററുകൾ സൃഷ്ടിക്കുന്ന പരിസ്ഥിതി നാശവും അടക്കമുള്ള ഗൗരവമേറിയ പ്രശ്നങ്ങൾ വിസ്മരിക്കപ്പെടുകയാണ്. പരിസ്ഥിതി പ്രവ‍ർത്തകയും എഴുത്തുകാരിയും പീഡിയാട്രീഷ്യനുമായ ഡോ. ആശ പ്രഭാകരൻ സംസാരിക്കുന്നു.

പന്ത്രണ്ട് വർഷത്തെ കാത്തിരിപ്പിനൊടുവിൽ മൂന്നാറിലെ മലനിരകളെ നീലക്കടലാക്കി നീലക്കുറിഞ്ഞി വസന്തം വീണ്ടുമെത്തിയിരിക്കുന്നു. എന്താണ് ഈ ചെടിയുടെ പ്രത്യേകത, നീലക്കുറിഞ്ഞി നേരിടുന്ന ഭീഷണികൾ എന്തെല്ലാമാണ്? നീലക്കുറിഞ്ഞിയെക്കുറിച്ചുള്ള പഠനങ്ങളിലൂടെയും സംരക്ഷണ പ്രവർത്തനങ്ങളിലൂടെയും ശ്രദ്ധേയനായ സസ്യശാസ്ത്രജ്ഞൻ ഡോ. ജോമി അഗസ്റ്റിൻ സംസാരിക്കുന്നു.

തൃശൂർ കയ്പമംഗലത്ത് ദേശീയപാത 66ൽ എട്ട് വിദ്യാർത്ഥികളുടെ മരണത്തിന് കാരണമായ അപകടം ഒരു യാദൃച്ഛിക സംഭവമല്ല. നിയമലംഘനങ്ങളും റോഡ് സുരക്ഷാ വീഴ്ചകളും ഒത്തുചേർന്നുണ്ടായ ഒരു ദുരന്തമാണ്. ഇതിൽ നിന്നും എന്താണ് നമ്മൾ പഠിക്കേണ്ടത്? പാലക്കാട് ഐ.ഐ.ടിയിൽ നിന്ന് ട്രാൻസ്പോർട്ടേഷൻ എഞ്ചിനീയറിംഗിൽ പി.എച്ച്.ഡി നേടിയ റോഡ് സുരക്ഷ വിദഗ്ധൻ ഡോ. ഭവിൻലാൽ. കെ സംസാരിക്കുന്നു.

നരേന്ദ്ര മോദി പൊതുപദവികളിൽ എത്തിയതിന്റെ 25 വർഷം ആഘോഷിക്കാൻ ഒരുങ്ങുകയാണ് ബി.ജെ.പി. എന്നാൽ ഫാസിസ്റ്റ് വിരുദ്ധ രാഷ്ട്രീയം നരേന്ദ്ര മോദി എന്ന വ്യക്തിയിലേക്ക് മാത്രം ചുരുങ്ങരുതെന്നും, അതിനപ്പുറം തങ്ങളുടെ അടിസ്ഥാന ലക്ഷ്യങ്ങൾക്കായി ഇന്ത്യയെ മാറ്റിമറിക്കുന്ന ആർ.എസ്.എസ് പദ്ധതിയെയാണ് ശക്തമായി എതിർക്കേണ്ടതെന്നും പറയുന്നു മുതിർന്ന മാധ്യമ പ്രവർത്തകൻ എൻ മാധവൻകുട്ടി.

ശബരിമല അയ്യപ്പനെ അധിക്ഷേപിച്ചുവെന്ന് ആരോപിച്ച് സണ്ണി എം കപിക്കാടിനും കുടുംബത്തിനുമെതിരെ നടക്കുന്ന വ്യാപകമായ സൈബർ ആക്രമണങ്ങളുടെ ലക്ഷ്യമെന്താണ്? സണ്ണി കപിക്കാടിനെ ഭീഷണിപ്പെടുത്തുകയും അപഹസിക്കുകയും ചെയ്യുന്നവരുടെ ​ഗൂഢപദ്ധതിയെ തുറന്നുകാണിക്കുകയാണ് പ്രഭാഷകനും എഴുത്തുകാരനുമായ ഡോ. ടി.എസ് ശ്യാംകുമാർ.

നേപ്പാൾ ദുരന്തം മാറിക്കൊണ്ടിരിക്കുന്ന ഹിമാലയത്തെക്കുറിച്ചുള്ള ഒരു മുന്നറിയിപ്പാണ്. കാലാവസ്ഥാ വ്യതിയാനം കാരണമുള്ള ഹിമാനികളുടെ ഉരുകൽ പരിസ്ഥിതിയെയും മനുഷ്യജീവിതത്തെയും എങ്ങനെയാണ് കൂടുതൽ അപകടത്തിലാക്കുന്നത്? എന്താണ് നമുക്ക് ചെയ്യാൻ കഴിയുന്നത്? ഭൗമശാസ്ത്രജ്ഞൻ ഡോ. സി.പി രാജേന്ദ്രൻ സംസാരിക്കുന്നു.

ഇന്ന് ആഗസ്റ്റ് 28, മഹാത്മ അയ്യൻകാളി ജന്മദിനം. എന്തായിരുന്നു അയ്യൻകാളി നയിച്ച പോരാട്ടങ്ങളുടെ യഥാ‍ർത്ഥ ലക്ഷ്യം? അയ്യൻകാളിയുടെ ആശയലോകത്തെ എങ്ങനെയാണ് നമ്മൾ ഇന്ന് മനസ്സിലാക്കാൻ ശ്രമിക്കേണ്ടത്? പത്തിരിപ്പാല ​ഗവൺമെന്റ് കോളേജ് പ്രൊഫസറും എഴുത്തുകാരനുമായ അനിൽകുമാ‍ർ പി.വി സംസാരിക്കുന്നു.

എല്ലാവർക്കും ഓണാശംസകൾ. ജാതിവ്യവസ്ഥയുടെ ഭാഗമായ കടുത്ത അസമത്വങ്ങൾ നിലനിന്നിരുന്ന കാലത്ത് പോലും മാനുഷരെല്ലാരും ഒന്നുപോലെ എന്ന് ചിന്തിക്കാൻ കഴിയുന്ന സമത്വത്തിന്റെ ഒരു സ്വപ്നം മലയാളികൾക്കിടയിൽ പൊതുവായി പങ്കുവച്ചു എന്നതാണ് ഓണത്തിന്റെ പ്രസക്തി എന്ന് പറയുന്നു എഴുത്തുകാരി വി.എം ഗിരിജ.

മുത്തങ്ങ കേസിലെ ശിക്ഷ ഹൈക്കോടതി മരവിപ്പിച്ചതിനെ തുടർന്ന് എം ഗീതാനന്ദൻ ഉൾപ്പെടെയുള്ള നാല് സമരപ്രവർത്തകർ കഴിഞ്ഞ ദിവസം ജയിൽ മോചിതരായി. വിചാരണ ഏകപക്ഷീയമായിരുന്നുവെന്നും മുത്തങ്ങയിൽ കൊല്ലപ്പെട്ട ജോഗിക്ക് നീതി ലഭിക്കണമെന്നും രണ്ടാം ഭൂസമരത്തിന് തുടക്കം കുറിക്കേണ്ട സാഹചര്യമാണ് കേരളത്തിലുള്ളതെന്നും പറയുന്നു ജയിൽ മോചിതനായ എം ​ഗീതാനന്ദൻ.

ഗവർണർമാരും വൈസ് ചാൻസലർമാരും വഴിയും പാഠ്യപദ്ധതിയിലൂടെയും വിദ്യാഭ്യാസ മേഖലയിൽ കാവിവത്കരണം നടക്കുന്നു എന്നത് ഇന്ന് രാജ്യം നേരിടുന്ന വലിയ പ്രതിസന്ധിയാണെന്നും വിദ്യാഭ്യാസ വ്യവസ്ഥയെ ഇതിൽ നിന്നും രക്ഷിക്കുക എന്നത് ജനാധിപത്യബോധമുള്ള എല്ലാ വ്യക്തികളുടെയും കടമയാണെന്നും പറയുന്നു അധ്യാപകനും ചിന്തകനുമായ ഡോ. പി.കെ പോക്കർ.

തിരൂർ മലയാളം സർവ്വകലാശാലയിലെ ഗവേഷക വിദ്യാര്‍ത്ഥിനി അനഘ ശശി ക്യാമ്പസിലെ അധ്യാപകരിൽ നിന്നും വിദ്യാർത്ഥികളിൽ നിന്നും നേരിട്ട ജാതിവിവേചനത്തിനെതിരെ സർവകലാശാലാ കവാടത്തിന് മുന്നിൽ അനിശ്ചിതകാല സമരം ആരംഭിച്ചിരിക്കുകയാണ്. പലതവണ പരാതി നല്‍കിയിട്ടും നടപടി എടുത്തില്ലെന്നും നീതി ലഭിക്കും വരെ സമരം തുടരുമെന്നും അനഘ പറയുന്നു.

ചാതുർവർണ്യത്തെയും ജാതിവ്യവസ്ഥയെയും ന്യായീകരിക്കുന്ന ആർ.എസ്.എസ് സർസംഘചാലക് ഗോൾവാൾക്കർ മുന്നോട്ടുവച്ച ധാരയും വർണ്ണരഹിത ജനാധിപത്യ സമൂഹത്തിനായി പോരാടുന്നതിലൂടെ ഡോ. ബി.ആർ അംബേദ്കർ മുന്നോട്ടുവച്ച ധാരയും തമ്മിലുള്ള സംഘർഷമാണ് സ്വതന്ത്ര ഇന്ത്യയിൽ നടക്കുന്നതെന്നും അംബേദ്കർ ധാരയുടെ വിജയമാണ് യഥാർത്ഥ സ്വാതന്ത്ര്യം സാധ്യമാക്കുന്നതെന്നും പറയുന്നു അഭിഭാഷകനും ഭരണഘടനാ വിദഗ്ധനുമായ ഡോ. ജി മോഹൻ ഗോപാൽ.

ഡല്‍ഹിയിലെ സിജെപി സമരത്തിന് പിന്നാലെ സമൂഹ മാധ്യമങ്ങളുടെ മേലുള്ള നിയന്ത്രണം ശക്തമാക്കിയിരിക്കുകയാണ് കേന്ദ്ര സര്‍ക്കാര്‍. സര്‍ക്കാര്‍ വിരുദ്ധ വീഡിയോകളുടെ പ്രചാരണം കുറയ്ക്കാൻ വേണ്ടി സോഷ്യൽ മീഡിയ പ്ലാറ്റ്ഫോമുകളിൽ നടത്തുന്ന ഇടപെടലുകൾ എന്തുകൊണ്ട് എതിർക്കപ്പെടണം? പബ്ലിക് ഇന്ററസ്റ്റ് ടെക്നോളജിസ്റ്റ് അനിവർ അരവിന്ദ് സംസാരിക്കുന്നു.

മിഷൻ സമുദ്ര പോലെയുള്ള വികസന പദ്ധതികൾക്ക് വേണ്ടി വലിയ തുക വകയിരുത്തുമ്പോൾ മത്സ്യത്തൊഴിലാളികളുടെ സുരക്ഷയ്ക്കായി പ്രഖ്യാപിക്കപ്പെടുന്ന പല പദ്ധതികളും ഫണ്ടില്ലാതെ കടലാസിൽ ഒതുങ്ങുകയാണ്. അതുകൊണ്ടാണ് അപകടങ്ങളുണ്ടാകുമ്പോൾ ഫലപ്രദമായി ഇടപെടാൻ കഴിയാതെ പോകുന്നതെന്ന് പറയുന്നു പതിറ്റാണ്ടുകളായി മത്സ്യമേഖലയിൽ പ്രവർത്തിക്കുന്ന ആക്ടിവിസ്റ്റും ഗവേഷകനുമായ എ.ജെ വിജയൻ

കഴിഞ്ഞ ദിവസങ്ങളിൽ കേരളത്തിന്റെ പല ഭാഗങ്ങളിലുമുണ്ടായ മിന്നൽ പ്രളയത്തിന്റെ കെടുതികൾ‌ നമുക്ക് ഒഴിവാക്കാൻ കഴിയുമായിരുന്നോ? ദുരന്ത നിവാരണത്തിൽ കേരളം ഇനിയും തിരിച്ചറിയേണ്ട കാര്യങ്ങൾ എന്തെല്ലാമാണ്? കേരള സംസ്ഥാന ദുരന്തനിവാരണ അതോറിറ്റി മെമ്പർ സെക്രട്ടറി ശേഖർ എൽ. കുര്യാക്കോസ് സംസാരിക്കുന്നു.

മുത്തങ്ങ സമരത്തിനിടെ പൊലീസ് ഉദ്യോഗസ്ഥൻ ആക്രമിക്കപ്പെട്ടു എന്ന കേസിൽ ​എം ​ഗീതാനന്ദൻ അടക്കം നാല് പേർ ശിക്ഷിക്കപ്പെട്ടിരിക്കുകയാണ്. എന്നാൽ മുത്തങ്ങയിൽ സമരം ചെയ്ത ആദിവാസികൾക്ക് നേരെയുണ്ടായ പൊലീസ് അതിക്രമങ്ങളിൽ ആരും ശിക്ഷിക്കപ്പെടാതെ പോകുന്നത് എന്തുകൊണ്ടാണ്? ഒരു ഘട്ടത്തിൽ മുത്തങ്ങ കേസിൽ പ്രതിചേർക്കപ്പെട്ട ആക്ടിവിസ്റ്റ് ജേ‍ർണലിസ്റ്റ് എം.കെ രാംദാസ് സംസാരിക്കുന്നു.

വ്യവസ്ഥാപിത രാഷ്ട്രീയ പ്രസ്ഥാനങ്ങൾ അധികാര രാഷ്ട്രീയത്തിലേക്ക് മാത്രം ചുരുങ്ങുകയും ചൂഷിത ജനവിഭാ​ഗങ്ങളുടെ സമരങ്ങളോട് ഐക്യപ്പെടാതിരിക്കുകയും ചെയ്യുന്ന സാഹചര്യമാണ് കേരളത്തിൽ നിലനിൽക്കുന്നതെന്നും ആ സമീപനം തിരുത്താൻ സമയമായിരിക്കുന്നു എന്ന പാഠമാണ് ഡൽഹിയിലെ വിദ്യാ‍ർത്ഥി പ്രക്ഷോഭം പഠിപ്പിക്കുന്നതെന്നും നിരീക്ഷിക്കുന്നു സാമൂഹ്യ പ്രവ‍ർത്തകൻ ഡോ. ആസാദ്.

രാജ്യത്തിന്റെ സകല കോണുകളിൽ നിന്നും ഉയർന്നുവന്ന യുവരോഷത്തിന് മുന്നിൽ പിടിച്ചുനിൽക്കാനാകാതെ, സമരം തുടങ്ങി 35ാം ദിവസം കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ ​ഗതികെട്ട് രാജിവെച്ചിരിക്കുന്നു. പുതു ചരിത്രമെഴുതിയ 'പാറ്റകളുടെ' സമരത്തിന്റെ പ്രസക്തി എന്താണ്? സമരത്തിൽ പങ്കുചേർന്ന ജെ.എൻ.യു വിദ്യാർത്ഥി അമൃത എ കാമരാജ് സംസാരിക്കുന്നു.

ഡൽഹിയിൽ നടക്കുന്ന അസാമാന്യമായ യുവജനപ്രക്ഷോഭം ഇന്ത്യൻ രാഷ്ട്രീയത്തിൽ വലിയ കോളിളക്കമാണ് സൃഷ്ടിച്ചിരിക്കുന്നത്. യുവരോഷത്തെ അടിച്ചമ‍ർത്താൻ നടത്തിയ ശ്രമങ്ങളെ അവർ പരാജയപ്പെടുത്തിയിരിക്കുന്നു. രാജ്യ തലസ്ഥാനത്ത് എന്തെല്ലാമാണ് സംഭവിക്കുന്നത്? മീഡിയവൺ ടിവിയുടെ ഡൽഹി ബ്യൂറോ ചീഫ് ഡോ. ഡി ധനസുമോദ് സംസാരിക്കുന്നു.

48 ടീമുകൾ പങ്കെടുത്ത ചരിത്രത്തിലെ ഏറ്റവും വലിയ ലോകകപ്പ് ഫുട്ബോൾ മാമാങ്കത്തിന് തിരശീല വീണിരിക്കുന്നു. സ്പെയിൻ രണ്ടാം കിരീടം ചൂടിയപ്പോൾ, നിറം മങ്ങിയ പ്രകടനവുമായി അർജന്റീനയ്ക്ക് നിരാശയോടെ മടക്കം. 2026ലെ ലോകകപ്പ് ആവേശത്തെ വിലയിരുത്തുകയാണ് എഴുത്തുകാരൻ സന്തോഷ് ഏച്ചിക്കാനം.

തൃശൂർ നഗരത്തിന്റെ സാംസ്‌കാരിക കേന്ദ്രമായ തേക്കിൻകാട് മൈതാനത്ത് രാഷ്ട്രീയ യോഗങ്ങളും പരിപാടികളും നടത്തുന്നത് നിരോധിച്ച ഹൈക്കോടതി വിധി അനൗചിത്യം നിറഞ്ഞതും ചരിത്രത്തെ നിഷേധിക്കുന്നതുമാണ്. സംഘപരിവാറിന്റെ രാഷ്ട്രീയ താത്പര്യങ്ങൾക്ക് ​​ഗുണം ചെയ്യുന്ന ഈ വിധിക്കെതിരെ പ്രതിഷേധങ്ങളുയരണമെന്ന് പറയുന്നു അധ്യാപകനും എഴുത്തുകാരനുമായ വി വിജയകുമാ‍ർ.

അയോധ്യ രാമക്ഷേത്രത്തിലെ സംഭാവന കൊള്ളയിൽ പ്രതിരോധത്തിലായിരിക്കുകയാണ് ആർഎസ്എസ് - ബിജെപി നേതൃത്വം. കൂടുതൽ തട്ടിപ്പുകൾ പുറത്തുവരുന്ന സാഹചര്യത്തിൽ ഈ വിഷയം വരാൻ പോകുന്ന യു.പി അസംബ്ലി തെരഞ്ഞെടുപ്പിൽ എങ്ങനെയാകും പ്രതിഫലിക്കുക. മുതി‍ർന്ന മാധ്യമ പ്രവ‍ർത്തകൻ വെങ്കിടേഷ് രാമകൃഷ്ണൻ സംസാരിക്കുന്നു.

വയനാട് തുരങ്കപാത നിർമ്മാണ മേഖലയിലുണ്ടായ മണ്ണിടിച്ചിലിൽ തൊഴിലാളികൾ മരിച്ച സംഭവം ഏറെ ആശങ്കപ്പെടുത്തുന്നതാണ്. പാരിസ്ഥിതികവും ഭൂമിശാസ്ത്രപരവുമായി ദുർബലമായ ഒരു പ്രദേശത്ത് ഇത്തരം നിർമ്മാണ പ്രവർത്തനങ്ങളുമായി മുന്നോട്ടുപോകുമ്പോൾ ശാസ്ത്രീയമായ പഠനങ്ങളും നിരീക്ഷണങ്ങളും ഒരിക്കലും അവ​ഗണിക്കാൻ പാടില്ല എന്ന് പറയുന്നു ജിയോളജി അദ്ധ്യാപകനും ഉരുൾപൊട്ടൽ മേഖലയിലെ ഗവേഷകനുമായ ഡോ. എസ് ശ്രീകുമാർ.

ഇടത് ഭരണകാലത്ത് പി.എസ്.സി വഴി നടത്തിയ വിവിധ നിയമനങ്ങളിലെയും പരീക്ഷകളിലെയും ക്രമക്കേടുകൾ തുടർച്ചയായി പുറത്തുവന്നുകൊണ്ടിരിക്കുകയാണ്. ലക്ഷക്കണക്കിന് ഉദ്യോഗാർ‍ത്ഥികളുടെ പ്രതീക്ഷയായ ഈ പൊതു സ്ഥാപനത്തിന്റെ വിശ്വാസ്യത എങ്ങനെയാണ് വീണ്ടെടുക്കേണ്ടത്. രാഷ്ട്രീയ-സാമൂഹ്യ പ്രവ‍ർത്തകനായ അഡ്വ. വിനോദ് മാത്യു സംസാരിക്കുന്നു.

ചരിത്രത്തിലെ ഏറ്റവും കടുത്ത ഉഷ്ണതരംഗത്തിൽ വെന്തുരുകുകയാണ് യൂറോപ്യൻ രാജ്യങ്ങൾ. കാലാവസ്ഥാ വ്യതിയാനത്തിന്റെ ഫലമായുണ്ടായ ഈ പ്രതിസന്ധി ജനജീവിതത്തെ എങ്ങനെയെല്ലാമാണ് ദുസ്സഹമാകുന്നത്? നെതർലൻഡ്സിൽ താമസിക്കുന്ന കാലാവസ്ഥാ ശാസ്ത്രജ്ഞയും ആംസ്റ്റർഡാം വ്രിയേ യൂണിവേഴ്സിറ്റിയിലെ ഫാക്കൽറ്റി ഓഫ് സയൻസ് എർത്ത് ആൻഡ് ക്ലൈമറ്റിൽ റിസർച്ച് അസോഷ്യേറ്റുമായ ഡോ. ബബിത ജോർജ് സംസാരിക്കുന്നു.

വിഴിഞ്ഞം അന്താരാഷ്ട്ര തുറമുഖത്തിലെ അദാനി ഗ്രൂപ്പിൻ്റെ 49 ശതമാനം ഓഹരികൾ ഷിപ്പിംഗ് കമ്പനിയായ എം.എസ്.സിക്ക് വിൽക്കാനുള്ള തീരുമാനം വലിയ രാഷ്ട്രീയ-നിയമ തർക്കങ്ങൾക്ക് വഴിയൊരുക്കിയിരിക്കുന്നു. ഈ ഡീലിന്റെ അടിയൊഴുക്കുകൾ എന്തെല്ലാമാണ്? ടി.യു.സി.ഐ സെക്രട്ടറിയും എം.എസ്.സി കപ്പൽ മുങ്ങിയ കേസിൽ നിയമപോരാട്ടം തുടരുകയും ചെയ്യുന്ന ചാൾസ് ജോർജ് സംസാരിക്കുന്നു.

ഇന്ത്യയുടെ പ്രതിപക്ഷ നേതാവ് എന്ന നിലയിൽ രണ്ട് വർഷം പൂർത്തിയാക്കിയ രാഹുൽ ​ഗാന്ധി മുന്നോട്ടുവയ്ക്കുന്ന രാഷ്ട്രീയം കോൺ​ഗ്രസ് പാർട്ടിയും ​കോൺ​​ഗ്രസ് നേതൃത്വം നൽകുന്ന സംസ്ഥാന സർക്കാരുകളും എത്രത്തോളം ഉൾക്കൊള്ളുന്നുണ്ട്? രാഹുൽ ​ഗാന്ധി എന്ന പ്രതിപക്ഷ നേതാവിനെ എങ്ങനെ വിലയിരുത്താം?

പുതിയ ജില്ലകളും താലൂക്കുകളും രൂപീകരിക്കുന്നതിനെക്കുറിച്ച് പഠിക്കാൻ ഒരു സമിതിയെ നിയോഗിക്കുമെന്ന സർക്കാർ പ്രഖ്യാപനം വന്നതോടെ പല ജില്ലകളും വിഭജിക്കണമെന്ന ആവശ്യം വീണ്ടും ശക്തമായിരിക്കുകയാണ്. ജനാധിപത്യ പ്രക്രിയയിൽ ഇത് എത്രത്തോളം പ്രധാനമാണെന്ന് വിശദീകരിക്കുന്നു വെൽഫെയ‍ർ പാ‍ർട്ടി സംസ്ഥാന ട്രഷറർ സജീദ് ഖാലിദ്.

ആർ.എസ്.എസിന്റെ രജിസ്ട്രേഷനും വരുമാനവും നികുതി വിവരങ്ങളും വെളിപ്പെടുത്തണമെന്ന് ആവശ്യപ്പെട്ടുകൊണ്ട് കർണാടക ആഭ്യന്തര മന്ത്രി പ്രിയങ്ക് ഖാർഗെ ഉയർത്തിയ ചോദ്യങ്ങൾക്ക് കൃത്യമായ ഉത്തരം നൽകാൻ ആർ.എസ്.എസ് ഭാരവാഹികൾക്ക് കഴിഞ്ഞിട്ടില്ല. പ്രിയങ്ക് ഖാർഗെയുടെ ഈ ഇടപെടൽ ആർ.എസ്.എസ്സിന് കനത്ത പ്രഹരമാണെന്ന് പറയുന്നു മുതിർന്ന മാധ്യമ പ്രവർത്തകൻ എൻ.പി ചെക്കുട്ടി.

പി.എം ശ്രീ ഫണ്ടുമായി ബന്ധപ്പെട്ട വിവാദങ്ങൾ തുടരുകയാണ്. എന്നാൽ കേരളത്തിലെ പൊതുവിദ്യാഭ്യാസം ഇന്ന് ആവശ്യപ്പെടുന്ന അടിയന്തിര വിഷയങ്ങളിലേക്ക് ഈ ചർച്ചകൾ എത്തിച്ചേരുന്നില്ലെന്നും ഭൗതിക സൗകര്യങ്ങളെക്കുറിച്ചല്ല, ​ഗുണമേന്മയെക്കുറിച്ചാണ് ഇനി ആലോചിക്കേണ്ടതെന്നും പറയുന്നു വിദ്യാഭ്യാസ പ്രവർത്തകനും എഴുത്തുകാരനുമായ പി പ്രേമചന്ദ്രൻ.

ജൂൺ 19ന് അവതരിപ്പിക്കുന്ന യു.ഡി.എഫ് സർക്കാരിന്റെ ആദ്യ ബജറ്റിൽ ഉൾപ്പെടുത്താനായി കേരളത്തിലെ സിവിൽ സമൂഹത്തെ പ്രതിനിധീകരിച്ച് ഒരുകൂട്ടം സാമൂഹ്യപ്രവർത്തകർ ചില സുപ്രധാന നിർദ്ദേശങ്ങൾ മുഖ്യമന്ത്രിക്ക് സമർപ്പിച്ചിരുന്നു. എന്തുകൊണ്ടാണ് ഈ നിർദ്ദേശങ്ങൾ പരി​ഗണിക്കേണ്ടത് പ്രധാനമാകുന്നത്? ഈ പ്രവർത്തനത്തിന് നേതൃത്വം നൽകിയ സാമൂഹ്യ പ്രവർത്തകൻ എൻ സുബ്രഹ്മണ്യൻ സംസാരിക്കുന്നു.

കെ.എസ്.ആർ.ടിയുടെ ഓർഡിനറി ബസുകളിൽ നാളെ മുതൽ സ്ത്രീകൾക്ക് സൗജന്യയാത്ര നടപ്പിലാക്കുകയാണ്. അസംഘടിത മേഖലയിൽ ചെറിയ വേതനത്തിൽ ജോലി ചെയ്യുന്ന ലക്ഷക്കണക്കിന് സ്ത്രീകൾക്ക് ഈ അവസരം ഒരുപോലെ ലഭ്യമാകണമെങ്കിൽ സർക്കാർ സഹായത്തോടെ സ്വകാര്യ ബസുകളിലും സൗജന്യ യാത്രയൊരുക്കണമെന്ന് പറയുന്നു സ്ത്രീ തൊഴിലാളികളുടെ അവകാശങ്ങൾക്കായി പോരാടുന്ന വിജി പെൺകൂട്ട്.

48 ടീമുകളും 104 മത്സരങ്ങളുമായി ഫിഫ ലോകകപ്പ് ഫുട്ബോൾ ചരിത്രത്തിലെ ഏറ്റവും വലിയ ടൂർണമെന്റിനാണ് വിസിൽ മുഴങ്ങാൻ പോകുന്നത്. എന്താണ് പ്രതീക്ഷൾ, ആർക്കാണ് മേൽക്കൈ? ചന്ദ്രിക ദിനപത്രത്തിന്റെ എഡിറ്ററും രാജ്യാന്തര സ്പോർട്സ് ലേഖകനുമായ കമാൽ വരദൂ‍ർ സംസാരിക്കുന്നു.

ഖജനാവിൽ പണമുണ്ടായിരുന്നു എന്ന് അവകാശപ്പെടുമ്പോഴും പട്ടികജാതി പട്ടികവർഗ്ഗ വിദ്യാർത്ഥികൾക്ക് സ്കോളർഷിപ്പ് ഇനത്തിൽ നൽകാനുള്ള കോടിക്കണക്കിന് രൂപ നൽകാതെയാണ് എൽഡിഎഫ് സർക്കാർ ചുമതലയൊഴിഞ്ഞത് എന്ന് വ്യക്തമാക്കുന്നതാണ് സർക്കാർ പുറത്തുവിട്ട ധവളപത്രം. എന്തുകൊണ്ടാണ് ഈ നീതി നിഷേധം തുടരുന്നത്? എയ്ഡഡ് മേഖല സംവരണ പ്രക്ഷോഭ സമിതി കൺവീനറും എഴുത്തുകാരനുമായ ഒ.പി രവീന്ദ്രൻ സംസാരിക്കുന്നു.

കേരളം അതിരൂക്ഷമായ സാമ്പത്തിക പ്രതിസന്ധിയാണ് നേരിടുന്നതെന്ന് വ്യക്തമാക്കുന്നതാണ് യുഡിഎഫ് സര്‍ക്കാര്‍ പുറത്തിറക്കിയ ധവളപത്രം. 5.07 ലക്ഷം കോടിയാണ് സംസ്ഥാനത്തിന്റെ ആകെ കടബാധ്യത. ഈ സാഹചര്യത്തിൽ എന്തായിരിക്കണം സ‍ർക്കാരിന്റെ മുൻഗണനകൾ. സാമ്പത്തിക വിദഗ്ധനും അധ്യാപകനുമായ ഡോ. വി.കെ വിജയകുമാർ.

സിൽവർ ലൈൻ പദ്ധതി ഉപേക്ഷിച്ചെങ്കിലും ഇ ശ്രീധരൻ മുന്നോട്ടുവച്ച അതിവേഗ റെയില്‍ പദ്ധതിയുമായി സംസ്ഥാന സര്‍ക്കാര്‍ സഹകരിച്ചേക്കുമെന്നാണ് സൂചന. സിൽവർ ലൈൻ പദ്ധതിക്ക് പകരം പരിഗണിക്കുന്ന ഈ അതിവേഗ റെയിൽ കേരളത്തിന് ഉപകാരപ്പെടുമോ? തൃശൂർ റെയിൽവെ പാസഞ്ചേഴ്സ് അസോസിയേഷൻ ജനറൽ സെക്രട്ടറി പി കൃഷ്ണകുമാർ സംസാരിക്കുന്നു.

വയോജന വകുപ്പ് രൂപീകരിച്ചെങ്കിലും സമാധാനവും സന്തോഷവും ഉറപ്പുവരുത്തുന്നതിനായി യു.ഡി.എഫ് വാഗ്ദാനം ചെയ്ത ഹാപ്പിനെസ് വകുപ്പിനെക്കുറിച്ച് ഒന്നും കേൾക്കാനില്ല. ദക്ഷിണാഫ്രിക്കയിലും നോർവെയിലും ഭൂട്ടാനിലും ഇന്ത്യയിലെ രാജസ്ഥാനിലും നിലവിലുള്ള ഈ വകുപ്പിന്റെ പ്രാധാന്യം എന്താണ്? ആദിവാസി മേഖലയിൽ വർഷങ്ങളായി പ്രവർത്തിക്കുന്ന ഗാന്ധിയൻ ആക്ടിവിസ്റ്റ് പി.വി രാജഗോപാൽ സംസാരിക്കുന്നു.

സംസ്ഥാനത്തെ വയോജനങ്ങളുടെ ക്ഷേമത്തിനായി പുതിയ പദ്ധതികൾ രൂപീകരിച്ച് നടപ്പിലാക്കാനും മുതിർന്ന പൗരരുടെ ക്ഷേമവും സംരക്ഷണവും ഉറപ്പാക്കുന്നതിനുമായി സംസ്ഥാന സർക്കാർ വയോജന വകുപ്പ് രൂപീകരിച്ചിരിക്കുകയാണ്. ഇത് എത്രമാത്രം പ്രതീക്ഷ നൽകുന്ന തീരുമാനമാണ്? സംസ്ഥാന വയോജന വിഭവകേന്ദ്രം ഡയറക്ടറും കേരള ആരോഗ്യ സ‍ർവകലാശാല ഗവേഷണ വിഭാഗം ഡീനുമായ ഡോ. കെ.എസ് ഷാജി.

ദിവസങ്ങൾക്കകം ദശലക്ഷക്കണക്കിന് സോഷ്യൽ മീഡിയ ഫോളോവേഴ്‌സുമായി ഇന്ത്യയിലെ പ്രമുഖ രാഷ്ട്രീയ പാർട്ടികളെപ്പോലും ഞെട്ടിച്ച 'ഡിജിറ്റൽ' മുന്നേറ്റമായി മാറിയിരിക്കുകയാണ് കോക്രോച്ച് ജനതാ പാർട്ടി (സി.ജെ.പി). ഇത്തരം ഫ്ലാഷ് മോബുകളുടെ രാഷ്ട്രീയ പ്രസക്തി എന്താണ്, പരിമിതികൾ എന്താണ് ? സാമൂഹ്യ നിരീക്ഷൻ ജെ.എസ് അടൂർ സംസാരിക്കുന്നു.

സംസ്ഥാന മന്ത്രിസഭയുടെ സത്യപ്രതിജ്ഞ ചടങ്ങില്‍ വന്ദേമാതര ഗാനം പൂര്‍ണ്ണമായും ആലപിച്ചത് വിവാദമായിരിക്കുന്നു. ഭരണഘടനാപരമായ ഒരു മുഹൂർത്തത്തെ രാഷ്ട്രീയമായി ദുരുപയോഗം ചെയ്ത ലോക്ഭവന്റെ നടപടി എതിർക്കപ്പെടേണ്ടതാണ് എന്ന് പറയുന്നു കവിയും എഴുത്തുകാരനുമായ പി.എൻ ഗോപീകൃഷ്ണൻ.

വി.ഡി സതീശന്റെ നേതൃത്വത്തിലുള്ള പുതിയ യുഡിഎഫ് സർക്കാർ ഇന്ന് സത്യപ്രതിജ്ഞ ചെയ്ത് അധികാരമേൽക്കുകയാണ്. ഏറെ ആത്മവിശ്വാസത്തോടെ ഭരണത്തിലേറുന്ന പുതിയ സർക്കാരിൽ നിന്നും പ്രതീക്ഷിക്കുന്നത് എന്തെല്ലാമാണ്? ചിന്തകനും എഴുത്തുകാരനുമായ ബി രാജീവൻ സംസാരിക്കുന്നു.

ദിവസങ്ങൾ നീണ്ടുനിന്ന അനിശ്ചിതത്വങ്ങൾക്കും അധികാര വടംവലിക്കും വിരാമമിട്ട് കോൺഗ്രസ് ഹൈക്കമാൻഡ് മുഖ്യമന്ത്രിയായി വി.ഡി സതീശനെ പ്രഖ്യാപിച്ചിരിക്കുന്നു. ജനഹിതത്തിന്റെ ഈ വിജയം ജനാധിപത്യത്തിന് ഗുണകരമാണെന്ന് പറയുന്നു കവിയും സാംസ്കാരിക പ്രവർത്തകനുമായ കൽപ്പറ്റ നാരായണൻ.

ഒരിക്കൽ കൂടി ഒരു സൂപ്പർസ്റ്റാർ തമിഴ്നാട് മുഖ്യമന്ത്രി പദവിയിലേക്ക് എത്തിയിരിക്കുന്നു. തമിഴക വെട്രി കഴകം അധ്യക്ഷനും നടനുമായ വിജയ് സൃഷ്ടിക്കാൻ പോകുന്ന മാറ്റങ്ങൾ എന്തെല്ലാമായിരിക്കും? ദി ഇന്ത്യൻ എക്സ്പ്രസ് ഡെപ്യൂട്ടി അസോസിയേറ്റ് എഡിറ്റർ അരുൺ ജനാർദ്ദനൻ സംസാരിക്കുന്നു.

എന്താണ് ബംഗാളിൽ സംഭവിക്കുന്നത്? ബി.ജെ.പിയുടെ ആധിപത്യത്തെ തടയുന്നതിൽ തൃണമൂൽ കോൺഗ്രസ് പരാജയപ്പെട്ടത് എന്തുകൊണ്ടാണ്? ഏറെക്കാലമായി കൊൽക്കത്തയിൽ താമസിക്കുന്ന എഴുത്തുകാരൻ സുസ്മേഷ് ചന്ത്രോത്ത് സംസാരിക്കുന്നു.

സമീപ കാലത്തൊന്നും നേരിട്ടിട്ടില്ലാത്ത തിരിച്ചടിയാണ് നിയമസഭാ തെരഞ്ഞെടുപ്പ് ഫലം എൽ.ഡി.എഫിന് നൽകിയിരിക്കുന്നത്. ജനങ്ങൾ ഈ പ്രതികരണത്തിലൂടെ ഇടതുപക്ഷ നേതൃത്വത്തിന് നൽകുന്ന സന്ദേശം എന്താണ്? എൻ.ഡി.എ നേടിയ മൂന്ന് സീറ്റുകൾ ഒരു അപായ സൂചനയായി മാറുന്നുണ്ടോ? രാഷ്ട്രീയ നിരീക്ഷകൻ ദാമോദർ പ്രസാദ് സംസാരിക്കുന്നു.

കേരളം നേരിടുന്ന ഊർജ്ജ പ്രതിസന്ധി പരിഹരിക്കുന്നതിന് തടസ്സമായി നിൽക്കുന്ന കാര്യങ്ങൾ എന്തെല്ലാമാണ്? ഊ‍ർജ്ജത്തെ സമഗ്രമായി മനസ്സിലാക്കാനും ഒരു പൊതു സ്വത്തായി കാണാനും നമുക്ക് കഴിയുന്നുണ്ടോ? ഊർജ്ജ ഉപയോഗം കാര്യക്ഷമമാക്കുന്നതിനുള്ള നയപരിപാടികൾ നമുക്കുണ്ടോ? ഊർജ്ജ വിദഗ്ധനും 'ഇക്വിനോക്ട്' മാനേജിംഗ് ഡയറക്ടറുമായ ഡോ. സി ജയരാമൻ സംസാരിക്കുന്നു.

കേരളത്തിൽ വേനൽ ചൂട് കൂടിക്കൊണ്ടിരിക്കുകയാണ്. വേനൽ മഴയെത്തിയാൽപ്പോലും ചൂട് കുറയാനിടയില്ല എന്നാണ് വിലയിരുത്തപ്പെടുന്നത്. ചൂടിനെ എങ്ങനെയാണ് നമ്മൾ നേരിടേണ്ടത്? ചൂടിന്റെ ആഘാതം കൂടുതൽ അനുഭവിക്കേണ്ടിവരുന്ന പാർശ്വവത്കൃത വിഭാഗങ്ങൾക്ക് എങ്ങനെ നീതി ഉറപ്പാക്കാം? കുസാറ്റ് അഡ്വാൻസ്ഡ് സെന്റർ ഫോർ അറ്റ്മോസ്ഫറിക് റഡാർ റിസർച് ഡയറക്ടർ ഡോ. എസ് അഭിലാഷ് സംസാരിക്കുന്നു.

നാളെ തൃശൂർ പൂരം. വെടിക്കെട്ട് അപകടത്തെ തുടർന്ന് ആചാരപരമായ ചടങ്ങുകൾ മാത്രമായി പൂരം നടത്താനാണ് ഇത്തവണ തീരുമാനിച്ചിരിക്കുന്നത്. എന്തെല്ലാം മാറ്റങ്ങളാണ് കാലോചിതമായി ഇത്തരം ആചാരങ്ങളിൽ വന്നുചേരേണ്ടത്? എന്തെല്ലാമാണ് അതിന് തടസ്സമായി നിൽക്കുന്നത്? പൂരത്തെക്കുറിച്ച് പഠനം നടത്തിയ എഴുത്തുകാരി ശ്രീജ രാമൻ സംസാരിക്കുന്നു.